【新增影片】

阿仙奴禮拜四晚喺歐霸盃主場以3:1反勝科隆，其中一位功臣就係喺下半場入替，只係踢咗幾分鐘就即刻建功嘅後衛哥拉辛拿斯，呢位綽號Bosnian Hulk嘅波斯尼亞國腳今季只係幫阿仙奴踢咗五場波，但已經直接或者間接貢獻四個入波，咁嘅表現好難令人相信，佢其實係踢左閘㗎！

哥拉辛拿斯坦今季已經喺科隆、同埋季初社區盾喺車路士身上射入兩球，至於兩次助攻，就分別喺英超贏李斯特城同般尼茅夫場波取得；兵工廠只要佢入波或者助攻，就場場都贏波㗎喇！其實今場阿仙奴都仲有幾個數字密碼㗎，一齊睇下！

●今場波係前鋒阿歷斯山齊士嚟到歐洲踢波後嘅第400場波，佢係喺2008年加盟意甲烏甸尼斯嘅；
●中場韋舒亞今場波後備上陣，佢對上一次幫兵工廠踢歐洲賽，已經係1,058日前嘅事，當時阿仙奴喺歐聯贏安德列治2:1；
●山神今場嘅入波係阿仙奴喺酋長球場所入嘅第650球，比賽夾埋就踢咗309場。