由賭王千金何超瓊、榮文蔚和表妹鄭詩韻組成的天機公關昨晚在中環置地舉行20周年慶祝酒會，城中富豪名人紛紛到場恭賀，當中包括超瓊的賭王父親何鴻燊、鄭裕彤、霍震霆、成龍、潘楚穎和傅明憲等。

賭王與四姨太梁安琪一早到場，祝酒時他更講爛gag，他說：「呢個公司係我個女第一間開嘅公司，𠵱家已經20年，我自己都查吓字典Occasions（天機的英文名）點解，第一解好機會，goodoccasions；第二解慶典，有乜慶典好介紹，都好唔過幫襯Occasions，佢哋20周年，有番咁上下，搵三個靚女，三個『立』晒，又嗲又識死𦧲，你哋冇得推。今日重陽搞活動，阿水都唔會幫襯，所以佢哋識計啱數，祝佢哋生意蒸蒸日上，虎虎生威有味道，其實我個女又靚又溫和，都唔似老虎。」
Pansy更首度展出20年來的ball場戰衣，她說：「為咗呢件事，我睇番好多舊相，好多開心片段，感觸快樂時間過得好快，要好好珍惜，其中有一件衫好有意義，係我一個好朋友未過身前同佢影過合照，就係陳百強。」
一向視天機為BB的Pansy也感觸良多，她說：「我由始至終都係認真，間公司開設初時，好多人都以為我哋當係興趣，之後又要拓展間公司，我又開始入信德，要兩頭忙。」早前Pansy透露金融海嘯令她身家蒸發七成，她說：「𠵱家唔止，不過呢個係數字遊戲，我哋係有基礎，個市場會康復。」
採訪：LawWaiMan、JessicaNgan
攝影：ChanShunChing、DickyChan