修哥（胡楓）今日同鄭欣宜及JoeJunior等，出席海洋公園「大熊貓生日暨刷新長壽紀錄慶祝會」，修哥仲四代同堂出現，親情滿瀉﹗修哥受訪話唔只今日，係日日都四代同堂，佢話剛才抱住嘅係3歲曾孫，真係好叻好多人錫，好似個「攬」球咁，個個見到都想攬，修哥話曾孫仲識唸唐詩㖭；

JoeJunior見到就話好戥修哥幸福，修哥就反讚佢二人世界都開心。修哥嚟緊會開騷，問佢曾孫會唔會上台？佢話唔會，佢哋讀書先，佢又話今次排練好勤力，讀書嗰陣都冇咁勤力，到時爆肚在所難免喎。