港股日日創新高，股神四叔又出嚟話，恒指有望到兩萬八，冇貨喺手嘅固然呻笨，但好邪嘅10月即將來臨，加上港股位高勢危，有貨喺手，都唔知好唔好沽咗先。其實話港股「位高」，係因為好多人都驚，如果港股再去番上次個高位，就會跌落嚟。

不過，究竟港股算唔算位高勢危呢，或者可以換另一個角度嚟睇，玩吓角色扮演遊戲。
以「點數」計，港股不錯是創了新高，但這是以港元計價，如果你係一個歐洲人，用歐元嚟香港炒股，以歐元計價的話，家陣仲未到2000年個高位。原因係歐元自2000年起踏上升軌，一直升到家吓，所以如果你係一個揸住歐元嘅投資者，你應該仲未覺得港股位高勢危。
同股王A傾開呢個問題，佢提醒敏妮，無論睇股市抑或個別股票，貴唔貴唔好睇表面，較王道嘅方法係睇市盈率P/E。敏妮即刻去㩒吓恒指嘅P/E圖睇吓。恒指現時預測P/E係18.58倍，雖然仍未到04年3月嘅高位20.19倍，即係話應該仲未到股災危險期，但計吓數港股亦都唔算平。
噚日，有個同事同敏妮講，「我媽咪揸住手港交所（388），百五蚊嗰陣買，見到港交所越升得高，佢反而越驚，唔知應唔應該𠵱家沽？」

敏妮都有港交所，暫時未諗住沽。噚日港交所曾經升到上199元，差1蚊就到兩張紅底，收報195.7蚊，升2.7元或1.4%。
http://manlitalk.com/blogs/