前藝人龐秋雁噚晚以音樂兒童基金會行政總監身份，到尖沙嘴文化中心出席音樂兒童攝影展及開幕禮，會場有百位小朋友攝影師，用佢哋嘅鏡頭記錄咗深水埗日常情況，龐秋雁話：「有一個攝影師叫KK朱，佢係義務影海報，當佢影嘅時候，有好多小朋友圍觀，好多小朋友都想影相，但係佢哋全部係7至13歲，來自基層單親家庭，又冇機會學音樂，我哋就俾一班小朋友免費學音樂，又有攝影師教小朋友學影相，而周大福慈善基金贊助就送出十部專業相機同贊助相展，俾基層小朋友透過鏡頭，影出家庭嘅快樂。」

龐秋雁話一班基層小朋友，唔怕醜，好叻，佢話：「我哋藝人唔化妝唔敢出街，以前拍拖要地下情，我出道係住公屋都唔敢同人講，怕人話自己無錢。」到場支持嘅何基佑，帶埋兩歲仔何清義一齊來，佢話：「我冇俾阿仔學嘢，佢o依家N班，好喜歡同媽咪整嘢食，我唔係怪獸家長，唔會提倡不停學嘢，希望佢有個愉快童年，5至8歲好緊要，唔可以有壓力，自己係幼兒級家長導師，我o依家做緊一個ViuTV節目，其中有一個個案，10個月大要睇手機，唔睇就唔食飯，我就係要幫手解決呢啲個案。」