【李八方online】安老院輸入外勞遇阻力 社署見勞工界代表「溫馨提示」
葉文娟安老院舍外勞社署勞顧會
安老院舍聲稱難請人,社署署長葉文娟今日約見勞顧會勞方代表作出「溫馨提示」,呼籲批准院舍申請輸入外勞。
無事不登三寶殿,事隔5年有多,社署今早再次同勞工顧問委員會6名勞方委員會面,署長葉文娟仲親自主持會議。八方聽聞,今次社署主動約見,因近月參與「改善買位計劃」嘅私營安老院舍,申請輸入外勞又變得困難重重,所以想向勞工界作「溫馨提示」,重申私院非買位部份可輸入外勞,但委員表明唔會鬆手。
現時私營院舍可透過補充勞工計劃輸入護理員,若屬買位私院,就只准非買位部份輸入外勞。過往幾年,喺勞顧會部份勞方委員反對下,2014至2016年買位院舍輸入外勞數目介乎264至328人,但2017年勞顧會換屆後,該年買位院舍輸入外勞數目突然急增至493人,較2015年大幅增加約87%。
直至今年勞顧會再度換屆先至「撥亂反正」,八方聽聞最近兩個月有買位院舍申請輸入外勞都遇上阻力,審批又變嚴謹咗,亦因如此,社署繼2013年後再度與勞方委員會面。據了解,署長葉文娟在會上作「溫馨提示」,買位院舍輸入外勞早喺1998年已經實行,2003年因遇沙士叫停,直至2014年重新推行。
葉文娟又話,而家買位院舍外勞人手比例唔高,但安老服務業人手短缺,呼籲委員考慮住院長者嘅福祉,「希望大家體諒」,但會上就冇討論放寬資助院舍輸入外勞。勞方委員周小松表明唔會鬆手,批評政府無善用婦女勞動力,好似而家同僱員再培訓局合辦嘅「先聘用、後培訓」護理員計劃,成效就不錯,但欠缺配套,好似託兒服務咁,參與計劃嘅院舍都唔多,「推廣力度遠遠不足」。
佢仲話,現時私營院舍已准許輸入外勞,但勞工處同社署監管不力,縱容無良僱主剝削外勞,「僱主可以用咁嘅不法手段對外勞,就唔想再請本地人」。另一勞方委員梁籌庭亦都話,現時買位院舍輸入外勞,已造成本地員工同外勞喺工資同待遇上有差異,「根本唔會有本地人肯做」。佢強調唔能夠容許外勞氾濫,否則欠缺誘因改善本地工人待遇。
-------------------------
《蘋果動新聞》訂閱新世代,4月開始免費訂閱,現在接受登記!
http://bit.ly/2Ja3IXw
-------------------------
全港打工仔特約:Lun廚動腦Q
加開1:30pm
3月11至22日
星期一至五1:30pm 10:30pm
http://bit.ly/2IZA8Ef