周焯華（洗米華）大仔周柏豪(洗米仔)同團隊開發嘅手機應用程式Oction今日喺中環舉行發佈會，洗米華帶同家人嚟撐場之餘，旗下藝人許志安、薛凱琪（Fiona）、劉浩龍都有嚟支持。

許志安同Fiona率先捐出自己嘅物品作慈善競投，善款分別捐去「愛護動物協會」同「奧比斯」。安仔捐出佢嘅絕版黑膠唱片，洗米仔笑住話：「我係咪一首都唔識？」聽罷狂笑嘅安仔即刻答：「就係透過呢張唱片去認識我啲歌。」安仔笑住話：「能夠經歷過黑膠唱片年代，到o依家仲唱緊歌，係一份榮耀，我覺得好驕傲，呢張唱片係我個人第三張唱片，好難搵，我啲珍藏要透過歌迷會搵到。」咁老婆鄭秀文有冇儲？佢笑笑口話：「唔見有喎，我都冇儲佢嗰啲㗎！」安仔透露稍後會同一位由出道已相識嘅男歌手合唱一首歌。

至於Fiona就捐出自家品牌嘅衫作拍賣，Fiona透露7月會開設自家品牌SPIRITUNUS嘅網上生意：「我有自己品牌嘅設計師，每日開會10至12個鐘，每件衫都要改6至7次，有人想投資我呢盤生意，幫我哋開店，但我鍾意親力親為。」Fiona話同拍檔合資7位數字，等生意上軌道先諗開舖。

Fiona表示好感謝如鄭秀文、楊千嬅、蔡卓妍、鍾欣潼、田蕊妮等好友為佢宣傳，佢話o依家會推出女裝，冬天會出男裝。現時身兼CEO，怕唔怕有更難追嘅感覺？佢笑住話：「所以更加要搵到真愛，真愛唔會介意高矮肥瘦、你嘅地位、你難唔難追，因為一個男仔好愛你，就算你係女王，佢都會覺得佢可以用真愛打動你嘅芳心，所以我完全唔驚。」