韓國神劇《太陽的後裔》前年播出時創下38.8%嘅高收視率，劇集不止喺韓國熱播，喺海外同樣大受歡迎，而「雙宋」宋仲基及宋慧喬、晉久、金智媛等主演更獲劇集帶挈而人氣急升，雙宋更憑劇定情，去年10月底結為夫妻。

《太陽》中軍人、醫生嘅浪漫故事，同樣吸引海外翻拍，台灣率先翻拍成台劇《最好的選擇》，以偶像劇形式為台灣軍方宣傳，更重現《太陽》嘅經典場面，卻一地負評。至於越南亦將會翻拍《太陽》做電影，電影公司更於噚日公開咗4位主角嘅海報，靚仔靚女組合都獲網民讚賞。

海報中，女主角身穿醫生袍、綁起馬尾出鏡，顯得優雅有氣質，與喬妹都好相似，而佢身旁嘅女兵比原版嘅金智媛略為成熟、幹練；企喺兩旁嘅男主角、男配角就有厚實嘅身材，直視前方，霸氣十足。

雖然越南版《太陽》眾主演嘅外貌獲讚，但其實越南之前翻拍嘅《神鵰俠侶》、《還珠格格》等經典劇集，都被網民直踩「慘不忍睹」，唔知今次越南版《太陽》能否令網民改觀？

更多韓流，喺晒《娛果》
http://fb.com/appledailyent