【新增影片】

香港時間年初二深夜12點開波嘅英足盃第4圈，曼聯主場以4:0擊敗韋根，殺入第5圈！

紅魔今場波派出朗尼同埋「小豬」舒韋恩史迪加兩位球星領軍，仲有桑馬達、費蘭尼同埋基斯史摩寧等主力。24分鐘桑馬達有一次埋門機會，可惜射高咗。31分鐘米希達利恩（MK恩）接應科素文沙傳中，離門6碼都射唔入，呢個moment魔迷可能會好無奈，卒之要等到44分鐘先睇到入波，「爆炸頭」費蘭尼接應小豬傳中，頭槌開紀錄。

換邊之後，主隊爆seed連入三球！57分鐘，基斯史摩寧接應「新亨利」安東尼馬迪爾開出嘅角球，頭槌頂成2:0！雖然喺68分鐘科素文沙傷出，但74分鐘新亨利又有助攻，今次得益嘅係MK恩。81分鐘，輪到小豬入波，接應安達靴里拉頭槌二傳，倒掛射成4:0，助球隊晉級第5圈！

小豬又入波又助攻咁勁，賽後獲選今場最佳球員是常識吧！

------
0143更新
81分鐘，安達靴里拉接應角球頭槌傳波，小豬建功，曼聯領先4:0

0135更新
74分鐘，曼聯一次快攻，MK恩接應安東尼馬迪爾傳送射入，主隊遙遙領先3:0！

0128更新
68分鐘科素文沙傷出，曼聯換入19歲小將Axel Tuanzebe。

0118更新
57分鐘，曼聯守將基斯史摩寧接應安東尼馬迪爾開出嘅角球，頭槌頂成2:0！

0111更新
失機，又係失機！49分鐘，曼聯守將科素文沙接應朗尼傳送，喺右路起腳射門，但唔中目標。

0050更新
44分鐘曼聯終於入波，小豬傳中，「爆炸頭」費蘭尼頭槌開紀錄，曼聯半場領先1:0

0034更新
31分鐘米希達利恩（MK恩）接應科素文沙傳中，離門6碼左腳射門，但係無功而回。

0028更新
24分鐘桑馬達左腳射門，可惜射高咗。1分鐘之後輪到韋根有機會，麥斯包華接應積基布頓傳送禁區外起腳被撲出。

0014更新
今仗首個射門嚟自韋根嘅哥林干洛尼，喺11分鐘攻門，可惜被撲出。

0008更新
英足盃第四圈重頭戲，曼聯主場鬥韋根開波！

------
年初二睇英足盃，識睇梗係睇曼聯喺第四圈迎戰英冠球隊韋根啦！曼聯早前喺英聯盃四強次回合出強陣，伊巴謙莫域同埋保羅普巴等都正選披甲，最後紅魔雖然以1:2輸畀侯城，但仍能殺入決賽，睇嚟領隊摩連奴都幾重視本地盃賽喎。其實個諗法係正確嘅，今季冇份踢歐聯，喺英超又唔係話踢得特別好，排緊第六，都唔知算唔算係爭標份子。摩佬將注意力集中喺英格蘭本土盃賽，如果一個唔覺意贏英聯盃，再捧埋英足盃，可以叫做雙冠王，仲可以令魔迷可以開心吓！

講咗咁耐，係時候入正題啦！曼聯主場鬥韋根，都真係嚴陣以待，伊巴同普巴冇份正選，但有桑馬、達朗尼、安東尼馬迪爾，中場有「小豬」舒韋恩史迪加、米希達利恩同埋「爆炸頭」費蘭尼，希望佢哋可以幫到曼聯拔「根」啦！

曼聯正選陣容
門將：羅美路
後衛：馬高斯盧祖、科素文沙、基斯史摩寧、勞基梳爾
中場：費蘭尼、舒韋恩史迪加、米希達利恩
前鋒：桑馬達、朗尼、安東尼馬迪爾

韋根正選陣容
門將：積及侯加特
後衛：積基布頓、哥林干洛尼、禾諾克、丹般恩
中場：大衛柏堅斯、麥斯包華、摩斯、沙恩麥當奴、米高積及斯
前鋒：基歷治