早前特約記者專程去到英國倫敦訪問一眾演員同男主角麥克華堡（Mark Wahlberg），之前有傳佢拍到今集就唔再拍，不過呢次似乎放風態度軟化：「如果米高（導演米高比爾）拍嘅話，我一定拍！我已經準備好同新演員拍攝，（學習）新科技、新機會、新路程，不過最大挑戰係要keep fit，我而家就要落啲工夫喇。」

提到戲中麥克華堡有追女仔情節，問佢點可以討女性歡心，佢就大爆以前追女金句：「我唔記得咗點返屋企，你帶我去你屋企啦。」

不過現實中麥克華堡已經同太太Rhea Durham結婚8年，維繫感情嘅秘訣，佢就話：「當然要二人世界，去旅行，製造啲特別氣氛，但經過咁多年，最重要都係大家要溝通。」

至於新任「變形女」羅娜赫杜克（Laura Haddock）雖然已為影星丈夫森加芬（Sam Claflin）生咗個囝囝，但Laura都秉承「變形女」精神，喺片中發揮吸睛魅力，更帶住BB四圍走。「拍《變形金剛》時，森都喺另一個地方拍攝，所以我地經常要飛嚟飛去，好彩BB鍾意睇新嘢，唔算太麻煩，我哋盡量都想一家人聚埋一齊。」非常溫馨。

記者Lily Lui直擊報道（Hollywood Foreign Press Association）