鼠年第一次同《蘋果》讀者見面，先祝大家身體健康、財源滾滾。受累 疫情 極速蔓延，港股紅盤急跌近800點收場，幸好美股早兩日開市，起了緩衝作用，否則恒指一早跌穿27000點大關了。

一如以往，每次大跌市我都會順道執倉，先將短炒及非核心貨沽出，因為炒作氣氛全消，越坐只會越墮落。套回現金換入一些強勢股，話明強勢，一定係升到冇朋友，卻因跌市換來低吸機會。當然，我沒有水晶球，唔知幾時會見底，入場預咗要捱價，所以最佳方法係分段吸納，將風險減至最低。

紙巾股維達（3331）業績後一飛沖天，今日更在逆（疫）市下創出新高，值得尊重。熱炒主因乃成績表亮麗，全年收益增長8%至160.7億元，毛利率升2.9個百分點至31%，帶動盈利增長75.3%至11.38億元，市盈率降至20倍，雖較同業恒安（1044）稍貴，但增長動力強得多，加上末期息大升五成至0.21元，故惹來資金追捧。

同一時間，疫情大大提高了市民的保護意識，主打紙巾及個人護理產品的維達，搖身一變成為概念股。今日股價下試18元即反彈，月初至今沿着10天線（17.26元）而上，可作為兩個低吸參考價，目標破頂無極限。