經典日劇《阿信的故事》女主角田中裕子與著名演員市村正親，今日現身尖沙嘴文化中心為香港公演嘅舞台劇《蜷川馬克白》接受傳媒訪問。

《蜷川馬克白》改編自莎士比亞四大悲劇《馬克白》，是日本已故戲劇導演蜷川幸雄作品，於其逝世一周年紀念再度公演，並衝出日本於香港等地演出，市村正親與田中裕子分別飾演野心勃勃嘅馬克白及馬克白夫人。

田中裕子演出「阿信」深入民心，今次演野心極大嘅馬克白夫人，被問到演出最難嘅地方？佢就話舞台劇功架最難：「故事以古代為背景，比一般更着重功架，還要令人感到真實感。」

除咗演戲仲要兼顧舞台劇，田中裕子話最初覺得演舞台劇比較辛苦：「最難適應是演舞台劇要好大聲，否認會被導演鬧，但經過與蜷川導演合作多場演出，現時已經沒有壓力。」蜷川出名嚴厲，談到與導演嘅難忘經歷，田中裕子同導演係喺33年前認識，最難忘係4年前導演嚟到綵排現場嘅一番說話：「我永遠都會喺度，一路睇住你，唔好忘記我。」佢話呢一刻永遠都唔會忘記。

其實田中裕子除咗演戲，80年代亦曾出過唱片，不過佢話已無意再推出專輯，問佢仲鍾唔鍾意音樂？會唔會喺屋企唱？佢就話：「喜歡音樂，屋企？（哈哈）都會喺屋企唱。」