當香港的新聞版面幾乎都是給特首（無論是現任或候選）所佔，不知道有多少人會留意到上星期有外國媒體報道，去年新加坡的國內生產總值（GDP）連續第二年超越香港。當然其中包括滙率因素，而我公司喺當地亦有業務，坡紙對港銀由啱啱開業嗰陣嘅四算幾到今日六個零，箇中滋味親身體會。另一主因無疑就是人口增長速度，該國人口由2005年的400萬人增至現在的500多萬，其中有很多都是外來移居人士，有銀冇銀的都有，因此亦造就了與香港遭遇的情況一樣——貧富懸殊的問題加劇。

香港貧富懸殊衰過獅城

雖則話貧富不均，但拉勻嚟計，點都好過我哋。在此特別要多謝本版讀者提供有關數據：回歸前，兩地的人均GDP相差無幾，十多年下來，新加坡的人均增長每年平均達到6%，而香港只不過係3%，足足差一半。複算下來，就是150%的分別！所以700萬比起一個少成200萬人口的經濟體系嘅總計生產力還要少！猶記當年亞洲金融風暴，新加坡所受的衝擊其實更加厲害，然而歷劫重生，近年經濟發展步伐比對香港，確實高下立見。難為我哋嗰位特首講嚟講去咪係當年自己有幾威水，帶領香港走出困境，度過風浪，無耐之前仲要大言炎炎話有乜「危機」最好喺佢剩餘任期發生。家陣真係求仁得仁，睇吓面對呢次「危機」，佢又能夠點樣打「救」自己呢隻大鱷。
其實我哋背靠祖國，有阿爺照住，最基本嘅民生需求，好似食水、主副食品都不愁供應，雖然品質就貴客自理，但係比起新加坡嘅毗鄰、亦被他們視為最大威脅嘅馬來西亞，起碼香港唔使擔驚受怕生存條件有威脅，亦都唔使應付額外的國防開支，新加坡喺呢方面嘅使費絕不失禮。不過為此亦都創造了商機，亞洲最大的Airshow剛在當地舉行，展品除民用航機還有軍用戰機！長咗咁多他人志氣，若然特首喺度，佢一定將香港嘅威風價值搬晒出嚟擺「騷」，好似乜嘢自由、法治同廉潔，當然係以佢自己嘅標準去展出！而外人可以見到的，卻是香港越嚟越混濁不清的空氣！WhataHKAirshow！
盧先亞