華億新媒體(419)周一股價急升16%,成交亦急增至近25億股,因公司宣布獲前大股東兼執行董事高振順知會,於4月27日在市場按每股0.18至0.188元出售4200萬股,並已訂立安排,擬按每股0.17元再配售14億股,套現2.38億元,即高振順將合共減持9.78%股權,至4.54%,共套現約2.46億元。
呢次係繼月前向CBC全資公司SpeedySwift配售新股及認股權證後另一次減持行動,而沽至低於5%,日後再減持亦毋須再披露,算是正式抽身而退。CBC呢間由網通(906)前CEO田溯寧創辦之投資基金,月前以7仙接貨後則變成最大股東,而CBC其他股東,包括澳洲傳媒大亨梅鐸跟全球最大廣告公司WPP集團。
從炒嘅角度,但凡係呢類轉型及轉手嘅公司,最重要係睇有無上一手留低嘅「蘇州屎」,假如高氏唔及早沽晒手貨出街,現任大股東始終都會有顧忌,因怕炒上集資途中,會有人突然沽貨,咁股價想炒得起都難。也因此,華億有主要股東沽貨,反而被市場認為係好消息而唔係壞消息,逆市炒上。