曾經喺寶哥哥銀號東亞銀行（023）擔任掌櫃（財務總監）嘅 Daniel尹焰強，離開賓架行列之後，先後涉足房地產公司同私募基金界，舊年3月，仲做埋化粧品公司卓悅控股（653）執行董事，負責財務安排同策略規劃，職場生涯都可算多姿多采。

聯交所披露權益顯示，尹焰強喺本周二，斥資13.9萬元買入50萬股卓悅，平均作價0.278元。上周五呢間公司先至發出盈警，今次由打工到入股，佢老哥係咪瞓身撐卓悅先？

Daniel只回應話，公司公佈咗前景，而零售業亦正開始改善，對於由賓架到地產再踩埋零售業之路有乜體會，佢就話無乜特別，都係上市公司運作，同埋因為認識管理層，先至輾轉加入卓悅；至於私募基金工作，就繼續以part-time形式幫朋友打理。

會計師出身嘅Daniel，2009年初告別做咗廿年嘅東亞，加盟「上海姑爺」羅康瑞旗下瑞安房地產（272），任董事總經兼財務總裁，前年7月辭職，轉任海富國際金融控股行政總裁。都話今時今日，年近60都可以展開第二或第三個事業，Daniel肯定係其中一員。

蘋果財經，關心你飯碗
http://fb.com/appledailyatm