第一夫人剪綵排頭位 - 李八方

蘋果日報 2005/07/07 00:00


曾太最近頻頻上電視,大家開始對煲呔嘅另一半另眼相看。原來曾太Selina不但係煲呔賢內助,重好有性格,睇佢寫嘅書法就知。
雖然曾太猛話自己好低調,但係呢個世界有一樣叫做富貴迫人來,你愈唔想曝光就愈多人想搵你。八方噚日收到中大中國文化研究所文物館嘅邀請,出席本周五「一代草聖:三原于右任書法藝術」嘅展覽會,突然發現主禮嘅剪綵嘉賓中,排頭位竟然係新特首夫人曾鮑笑薇,大紫荊得主饒宗頤教授只係排喺第二,而中大校長劉遵義就敬陪末座。
但係講真,八方都好欣賞曾太,因為中國書法好值得推廣,如果第一夫人都愛此道,咁就有機會推而廣之。今次展覽包括于老早中晚各期嘅作品,共有九十幾件,當中有一幅包含于老嘅書法、張大千嘅畫,加饒宗頤題字,實在好有意思。

傳真︰2623-9278
電郵︰[email protected]