着住白袍嘅醫生向來畀人嚴肅嘅感覺，但係59歲嘅外科專科醫生林建煇，早排喺記協周年晚宴，着住件閃到爆嘅披肩戰衣上台唱《陸小鳳》，仲話自己「閃過秋官，姣過羅文」，徹底改變大家對醫生嘅印象。原來林醫生出身演藝世家，爸爸係仙鳳鳴劇團音樂領導林兆鎏，《帝女花》同《再世紅梅記》入面唔少小曲都係出自林父手筆，就連粵劇名伶阮兆煇都係佢徒弟。

捐幾十萬幫聽障兒童

自細出入戲棚，林建煇細細個就鍾意唱歌，奈何父母唔鍾意佢入行，最終走咗去做醫生，得閒先出嚟表演吓。做得醫生，生活當然無憂。早幾年一次表演嘅時候，佢第一次接觸到聽障兒童，知道佢哋因為表面睇落冇乜缺陷，所以成日俾人忽視，於是成立咗「奧廸慈善基金」，送助聽器畀有需要嘅人。唔計其他善心人，佢自己前前後後都捐咗幾十萬，已經幫咗70個受助家庭。
林醫生今年再捐100萬成立獎學金，獎勵一啲喺學業或者演藝方面有好成績嘅聽障學童。佢嘅熱心仲感動咗身邊嘅朋友齊齊捐，𠵱家已經再籌到幾十萬。如果對佢哋嘅服務有興趣，可以打熱線電話31889510查詢。