卓先地產最新物業報告話，喺六同七月份，金鐘區總共有十六宗寫字樓成交，總值約一億七千萬，當中銀主貨佔九成，總值八千四百萬，其中力寶中心嘅十一宗成交，銀主貨佔八宗。
卓先測量師行聯席董事潘子明話，力寶中心呎價由最低潮時唔使三千蚊，𠵱家升番到三千二至三千三蚊。市場重出現短炒成交，一名投資者用約三千蚊呎，買入一座三十七樓一室，約二千一百方呎，再以高一成一嘅價錢轉售。
𠵱家力寶只係得番兩個銀主放盤，雖然有買家出價，但係銀主就希望收多少少，所以重未成到。呢個情況最近普遍咗，一般都係加一兩個巴仙，形成拉鋸情況。
潘子明估計，啲銀主盤可能喺半年內賣得七七八八，到時市場點走就較難料。由於卓先都做唔少銀主拍賣，所以佢哋係時候要重新部署，例如做多啲招標同項目投資嘅代理工作。

利記廣州辦睇樓團
利嘉閣今個禮拜三，一行十幾人，包括董事廖偉強、董事總經理何紹章，同「至尊豪宅」主席張偉文，上廣州兩三日，拜會當地嘅發展商，強化大家嘅關係，同埋了解當地嘅情況，順便傾吓辦睇樓團事宜。
聽講佢哋重帶咗啲中上價豪宅資料去，同對方交流，了解吓佢哋對邊類物業感興趣，等第時推銷都容易啲。