林芊妤（Coffee）同拍拖3年幾嘅男友翟志榮（Weng）噚晚低調於酒店舉行婚宴，婚宴一切從簡。身穿白色露背長裙嘅Coffee，簽完紙之後，即刻好sweet咁咀嘴，現場傳嚟唔少歡呼聲！

雖然從簡，但Weng為Coffee準備嘅結婚戒指一啲都唔求其，大大粒鑽石閃到爆。今日Coffee喺旺角接受《蘋果》訪問，佢笑住話：「老公話我呢排都要戴住佢，不過噚晚就畀佢開咗個玩笑，突然問我『唔係你攞戒指咩？』因為佢一向都係老實人，冇諗過佢會咁，全部人望住我，我唔知點好，眼淚都流落嚟，佢先攞出嚟，真係一啲都唔搞笑囉，夜晚返屋企已懲罰佢！」

Coffee仲話，今次婚宴全部嘢一腳踢，化妝整頭都自己搞掂：「化妝師問要唔要幫我，我都話唔使，自己同老公抽住好多袋嘢去現場。本來我連衫都冇借，但朋友叫我唔可以咁hea，我先去借咗條隆重啲嘅裙！」

媽咪有乜咩贈言？Coffee話：「冇呀！反而姑姐突然叫我同媽咪講啲嘢，我冇諗過以前自己喺台上咁有經驗，竟然會講唔到，只識係咁喊，都覺得好失禮，但真係好感動。」

恭喜晒Coffee！祝白頭到老，幸福快樂啦！

精選娛聞，喺晒《娛果》
http://fb.com/appledailyent