韓國天團BIGBANG隊長G-DRAGON(GD)同女團f(x)前成員Sulli，兩人分別所屬YG事務所以及SM事務所，兩人除咗都係歌手，可能喺舞台上有過幾面之緣，似乎真係大纜都扯唔埋，但原來兩人都有交情㗎！

GD上周日完成香港嘅戶外演唱會之後，就飛到巴黎參加時裝周，隨後再現身自家潮服品牌PEACEMINUSONE嘅展覽。而展覽除咗GD屋企人親身飛到巴黎力撐之外，原來Sulli孖圈中好友具荷拉、女團Brown Eyed Girls成員佳仁都去咗撐場。

GD自家品牌PEACEMINUSONE嘅官方Instagram上載咗GD以及友人開派對狂歡嘅相，就畀網民喺其中一張相認到有具荷拉嘅身影，之後仲見到該官方Ig上載咗有Sulli、具荷拉、佳仁嘅合照，可見3人都有份出席GD搞嘅派對，不過隨後呢張3人嘅合照已經消失喺該官方Ig，似乎已經被人刪除咗。

不過Sulli及佳仁嘅Ig就有張貼3人喺巴黎街頭漫步嘅相，大晒友情。