【本報訊】常言道:苦盡甘來,但此番話並不適用於歡嫂身上,捱了大半生,兒孫滿堂,原以為可跟丈夫安享晚年,卻於去年確診肺癌第四期,癌細胞其後更擴散至大腦,需服食昂貴標靶藥。子女知道歡嫂喜歡旅行,如今只希望完成母親的微小心願, 一家人到桂林旅行,永存珍貴回憶。
記者:陳嘉穎、潘婉玲 攝影:張鼎和
「有人問,點解唔畀佢住安老院?喺屋企佢會比較舒服,住安老院嘅話,個人好快會冇意志。」歡嫂長女從小習慣撐起半邊天,儘管婚姻失敗,年逾半百需獨自撫養兒子,仍來回奔走照顧病母以及86歲老父。
與40歲幼子同住的歡嫂,去年7月,確診患上肺癌第四期,癌細胞其後更擴散至大腦,病得瘦骨嶙峋的同時,又飽受膝蓋痛困擾,走路亦需參扶。由於肺功能逐漸減弱,歡嫂變得沉默寡言。「佢成日唔出聲,我諗佢其實心入面有好多唔開心,但唔會喺我哋面前講。」
年輕時的歡嫂,做過工廠女工,跟任職清潔的丈夫胼手胝足,養育2子3女,更曾賖借度日。儘管三餐不繼,但對子女疼錫有加,「讀書嘅時候,我要上台演話劇,佢買咗一條好靚好貴嘅裙畀我上台著,嗰陣5仙一條油炸鬼,嗰條裙要70蚊。」
長女憶起往事,紅了眼眶,歡嫂在旁默默聆聽。窮人的孩子早當家,長女中五後便投身社會,「同學都會諗,係咪繼續升學,去邊間學校讀中六,我唔會,我知道完全唔駛諗,我打算一畢業就出嚟做嘢。」
病魔折磨歡嫂,卻讓一家人更團結,「我一星期返六日工,依家放假上晝陪個女,下晝就返嚟。」歡姐的第四名孩子是任職地盤工人,亦是首個兒子,因此童年時受盡萬千寵愛,「我覺得自己虧欠咗佢哋,無為佢哋做過啲咩!」
他說「佢(歡嫂)以前好鐘意旅行,一直都好想去桂林,因為成日聽人講,嗰度好靚。」如今這微小的夢,是否能實現尚是未知之數。不過家人希望「遠近都好,好想一家人去一次旅行,但點都要等佢養好身子先!」
「蘋果日報慈善基金」正跟進歡嫂窘境,希望替她籌措藥費。
「歡嫂」捐款編號:C3740
網上捐款: http://bit.ly/1nQRthE