近日正忙於拍攝新片《比老虎還可怕的冬季客人》嘅46歲韓國女星高賢貞，於1995年與韓國新世界百貨公司副總裁鄭溶鎮結婚，兩人育有一子一女，不過高賢貞慘被鄭溶鎮家族成員排擠，兩人最後於2003年離婚收場，而高賢貞獲得15億韓圜贍養費，但就冇咗一對子女嘅撫養權及親權。

不過上周五播出嘅綜藝節目《星星Talk Show》中，就公開咗高賢貞一對子女嘅近況，引起外界關注。節目當日播出嘅「男人的資格-鄭溶鎮副總裁」嘅特輯中，就公開咗一對子女目前喺美國留學嘅事，有份演出節目嘅金泰賢表示：「已經18歲嘅細女係Instagram紅人，會與追蹤佢嘅人交流代妝品。」

而當日有份演出節目嘅評論家就公開同高賢貞細女嘅對話，該評論家表示曾問細女「爸爸係個點嘅人？」，細女稱「好帥氣而且非常慈愛，但一發嬲就好得人驚」，對於被提到同親生媽咪(即高賢貞)好似樣嘅話題，細女又指「唔好咁講，佢係好靚嘅人」，該評論家就指細女提起高賢貞時似乎有對高賢貞嘅羨慕。

該評論家稱亦有小心翼翼地問到繼母嘅事，高賢貞細女就表示：「事實上，我對於依家仲係叫佢繼母都覺得有啲抱歉，因為到依家為止都冇咁愛我嘅人。」似乎與新家人都相處好好。另外，同樣演出節目嘅一名記者就表示：「高賢貞一對仔女都好高，外貌亦係靚仔靚女，而且大仔讀書好叻，曾連續幾年擔任學校學生會會長，今年3月被美國康奈爾大學（Cornell University）錄取。」