與三名9歲至14歲子女靠綜援生活的單親爸爸，去年12月中留下一百元予子女後，北上會女友，多天未有回家，直至社工家訪揭發，當時其中一名小童正發燒。涉案爸爸今在九龍城裁判法院承認三項虐兒罪，辯稱北上後本打算即日回港，但因女友發燒而要留下照顧她。主任裁判官吳蕙芳聞言立即訓斥謂：「嗰三個係你親生仔女，你反而唔照顧，去照顧個成年女人？」

52歲無業被告今承認於去年12月19日至21日犯案。吳官將案件押後至下月11日判刑，其間索取被告的感化及驗尿報告，被告獲准繼續保釋。據知，涉案三名小童現由社署照顧，每逢周末可返家。

辯方求情時透露，被告於2013年因事坐牢，妻子此時移情別戀，遺下三名子女。被告出獄後一直失業，一家四口靠綜援過活。

案發當日，他原打算到深圳會女友後即日返港，惟女友發燒至40度，他遂留在深圳照顧女友。吳官即時截停辯方陳詞，直指：「嗰三個係你親生仔女，你反而唔照顧，去照顧個成年女人？個女人自己唔識睇醫生㗎？」

辯方續指，被告離港前曾留下一百元給子女。吳官即時回應：「你以為一百蚊夠三個細路食一日？你決定要留多一日，都已經唔記得只係畀咗一百蚊三個細路。」辯方則指，被告在第二天曾與大女聯絡，著她找朋友借錢。吳聞言謂：「細路仔邊有通財之義嘅朋友？大人都未必有啦。」

吳官及後向被告謂：「我知你太太離棄你，要一個男人湊大三個細路唔容易。我雖然體會唔到，但我體諒你。有朝一日，你接個女人落嚟，你要講明自己仲有三個細路，等佢考慮將來。」

吳官又謂：「呢三個細路，係你決定將佢哋帶嚟呢個世界，係你親生骨肉，响你能力之內，應該畀最好嘅。出邊女人唔係，冇血緣關係。」

【案件編號：KCCC1367/19】
記者陸羽平

---------------------------
【六四30】守住歷史 拒絕遺忘
https://hk.adai.ly/zdzKtt2RiW

---------------------------
星期一至五晚上10點半
《動腦Q》Let’s Q the money！
http://bit.ly/2QW8LcI