【投石投出路】由醫療界轉做主播 羅鈺文:都係前線工作
羅鈺文醫療界護理學主播財經女神
無綫近年不斷流失新聞主播,而離巢之人都有一個共通點,就是發展越來越好。一向被網民封為女神嘅無綫女主播羅鈺文(Yuki),前年嫁人時已經令不少宅男喊到毛巾都濕晒,到今年2月尾,Yuki正式離開主播崗位(新聞連結: https://bit.ly/2r00rOr ),佢離職時喺社交平台留言:「這是個工作了五年半的地方,充滿淚水、辛酸,亦滿溢人情、關顧,由畢業開始在這裏打拼,學做事,也學做人,向來對道別『敏感』。走出安舒區,即將迎接新一頁,俗套說句,天下確是無不散之筵席,多謝各位。」
現年31歲嘅Yuki日前喺尖沙嘴接受《蘋果》專訪,佢透露現時轉投財經公司擔任管理層。重提當年入行經過,Yuki話:「其實我入行都幾搞笑,我係讀護理學,醫療界缺人手,我知道讀4年出嚟係一定可以就業,但讀到第3年試下水溫,周圍send CV,之後去咗亞視見工,佢哋請咗我,咁就膽粗粗做咗一年。」Yuki之後重返校園讀埋最後一年,但感到自己對傳媒有興趣,就去再讀一個碩士課程,然後就一直留喺傳媒界。
有指Yuki由白衣天使轉做傳媒工作,反差似乎很大,問到家人有冇反對?Yuki坦言,父母一定會覺得留喺醫療界條路會順啲,但Yuki就覺得其實做記者同護士都一樣係好前線嘅工作,大家都有相同地方,只係唔同職業去幫呢個社會,所以屋企人都支持。
講到令Yuki最深刻嘅採訪經驗,就係2010年馬頭圍道冧樓,佢話:「嗰時我啱啱喺附近,公司就叫我即刻去現場,去到見到成楝樓冧咗,個感覺真係好震撼,嗰時自己係新人,係完全唔知點做,好彩好快已經有好多師兄師姐到咗教我點做,點樣採訪,呢啲都係令我慢慢成長嘅回憶。」
精選娛聞,喺晒《娛果》
http://fb.com/appledailyent