谷中今晚（21日）第五場三班1200米跑港交所盃，有個別上市公司話事人及其家人同晚派出實力馬，睇個款就唔似趁熱鬧咁簡單。

例如第二場四班1200米「帶盈來」馬主晋安團體，主事人王氏家族班底做開物業收租，年頭剛剛成功掛牌上市。

同場「驫驫」馬主葉俊亨夫婦旗下化妝品集團卓悅，上咗市十幾年。如果呢對馬到時一Q返嚟，咁就襯晒呢晚氣氛！

除咗「驫驫」外，葉俊亨一家仲有第三場「一支梅」及第八場「最驫」今晚跑。

大家都知今季佢哋好旺，連埋「放眼量」及團體馬「大英雄」贏咗幾場頭馬，跟紅頂白捧吓佢哋場冇壞。