話說最近網上兩位財經界KOL唔炒股票、唔炒Bitcoin，走咗去炒花生。事緣係「少年股神」火燎森與海納資產管理有限公司創辦人吳家順連同旗下的支持者，一齊加盟一個叫「屈機」的投資項目，正所謂講錢傷感情，該項目疑似出現阻滯，有部分加盟者投資了多個月後仍未收到貨品，自然就嘈交，吳家順就索性在其facebook上爆大鑊，引來火燎森非常不滿，以「違反保密協議」為由，發動公眾投票，要求營運方IVMC將吳家順嘅十萬蚊本金沒收，並「捐畀慈善機構」。

我明白一個加盟者有權發動聯署去營運商取消另一個加盟者的資格，但我唔明點解可以指令將所有加盟費沒收並捐去做善事。作為加盟者嘅佢憑什麼去收集大家的意願、全名、電郵以及訂單編號？當中我最欣賞的是，呢個聯署係訴諸法律及合約條文，但整個聯署並沒有任何私隱保障條約和細則。不知道作為營運方的IVMC，對於有加盟者取得大量自己公司的客戶資料有什麼感想？這是事先授權的商業活動嗎？

按理說畀咗十萬蚊本金，仲要等幾月都未收到貨，跑出來投訴也是情理之內。現在卻由原告變被告、由加盟者變成放蛇人，喂，大拿拿十萬蚊呀，買通個大陸假和尚放返白素貞出嚟都得啦，放咩蛇要咁貴呀？仲要被打成尋釁滋事，公投充公所有加盟費。而火燎森亦聲稱再玩落去「我仲要將今次事件定為損失500萬以上，要區域法院以上級別審判，需要請律師，冇得自辯」、「最少可以玩三、四年」。

小加盟者望見火燎森如此霸氣的宣言後，就算想投訴，都要小心免得直犯龍顏。你估有多少個加盟者敢喺呢個疑似記名的投票裡，投下反對票？火燎森呢場北韓式公投crossover打土豪分田地鬧劇，其實充滿娛樂性。

不過，嚟到呢度，我又唔係好明啦，如果火燎森並不是IVMC的股東或執事人，咁合約裡甲方乙方都唔關佢事，佢點樣告個加盟商毀約？不過，我諗要告起上嚟總有辦法，這反正也不是重點。有趣的是，真的要打官司起嚟，要是自己也是受害人的話，點解唔告個半年都未交貨的品牌授權商，反而告個投訴人？再者，五百萬的估算是如何判定？而家連貨都未有，要證明損失似乎不太容易，可能要搵幫萬寧印花估價每卷三萬蚊的那位高人估算才有機會了。

又，如果大家告起上嚟，火燎森真係告到吳家順，咁吳家順係咪又可以告返間IVMC「將今次事件定為損失500萬以上，要區域法院以上級別審判，需要請律師，冇得自辯」？佢有五百萬，正常；吳生有冇五百萬，我唔知，但IVMC想唔想擺低五百萬打呢場「最少可以玩三、四年」的官司？再假設兩單case真係大家都告得入，吳家順也不過是從IVMC手上，把五百萬轉手交給另一個人而已，至於嗰五百萬嘅羊毛係出自邊個身上？小加盟者們，你說呢？

利申：本人文字不代表本人意見，本人意見不代表本人想法，本人想法不代表本人觀點，本人觀點不代表本人立場，總的來說，唔好告我，我喺倫敦好難告㗎。

專欄作者簡介：
倫敦人妻先生
既是人妻，也是先生；我八婆所以我存在。

Facebook link：
https://www.facebook.com/mrwifelondon/