炒股佬炒錯嘢，認輸止蝕離場，好興用個barg字，例如將某某股barg咗，由「斃」普通話發音變出嚟，即係打靶咁解。
隔晚美股掂檔，日股亦高開，港股好自然跟埋高開，一開就係17501，啱啱高過17500，於是乎，恒指熊證6204與6214即刻打靶，barg咗。
最令買咗兩隻恒指熊證嘅炒家條氣唔順嘅，係恒指見過17500多啲之後，跌番落去，冇仇報。恒指如果再散幾百點，啲炒家更加會變成生蝦咁跳。
大市短期仍有調整壓力，做賊（揸P輪）好過做兵（揸C輪），不過咪睇得太淡，落場做嘢揸P輪，得些好意須回手，然後反手買番C輪。
國壽P輪3418：平保（2318）盤數靚絕，但股價一樣有回吐。遲吓國壽（2628）派成績表，亦預咗盤數靚，好可能亦會有回吐，除非宣布前跌定先。買國壽P輪3418，明年4月初夠鐘，輪價1.16元，溢價14%，槓桿率11.8倍（有效4.2倍），引伸波幅38.9%。數據唔靚，但其他同類輪更加唔靚。

有啲國壽P輪溢價28%至47%，叫人買佢哋，即係叫人去買貨嚟barg。
滙控P輪4862：滙控（005）有沽壓，短炒P輪4862，11月到期，輪價24.2仙，溢價4%，槓桿率58.3倍（有效19倍），引伸波幅15.1%。
章盛