鄧萃雯今日喺九龍灣出席創世電視節目《喜樂婆婆會客室》錄影，接受小金子主持訪問，主題係喜樂，18歲入行嘅雯女提到人生最難過嘅時刻，喺30歲人生最賺錢嘅時候，買樓遇上負資產，佢話：「當時係我賺錢最多嘅一年，咁就送我一程，以為呢個已經係低谷。之後有信仰，再大嘅困難都唔緊要，唔會咁揮霍。」

問佢係咪唔敢再買樓？雯女就話之後一直租樓，直至08年喺叔叔引薦下，先買咗一個物業，佢話：「係一間我供得起，冇壓力嘅細單位，所以工作係冇壓力。好多錢嘅人，係好難進天國。」問到接無綫劇係咪隨緣冇壓力？雯女話：「所有劇都係，量力而為。」

提到感情，雯女就話好好，佢仲話大家誤解佢係好dry好寂寞，但佢話就算自己單身都唔會寂寞，好享受自己一個人，但係身邊嘅朋友就話好難幫雯女搵對象，因為佢表面太強，雯女就笑話有咁嘅外表係恩典，但事實上自己係有好多低能嘅地方。

精選娛聞，喺晒《娛果》
http://fb.com/appledailyent