日本著名藝人春菜愛稱得上係當地最成功嘅變性人，因為佢建立親民形象，又深受電視台歡迎，令春菜愛早已入屋，曾出唱片又活躍公仔箱嘅佢仲贏得09年度國際性變人選美大賽「國際皇后」（Miss International Queen），展開璀璨嘅中女人生，不過佢始終未圓嫁人心願。

報稱44歲嘅春菜愛工作上有唔少披嫁衣經驗，多年前已表明十分恨嫁，佢雖然拍拖多次，可惜每次都係食詐胡，趁好姐妹藤原紀香第二度出嫁，春菜愛日前於公開場合再講：「好想結婚呀！」春菜愛最近搭上年僅21歲嘅小鮮肉男友，足足相差23年，春菜愛做得男友「老竇」有餘。新一期《週刊女性》報道，春菜愛與男友於半年前開始交往，感情越來越穩定，仲開始同居已經3個月。日前，戴上「LOVE」字帽嘅春菜愛，同男友行孖咇到世田谷區嘅咖哩店撐枱腳食午餐，兩人表現恩愛，全程有講有笑，雜誌事後向事務所求證，承認春菜愛當日的確同男友拍拖。