當年今日
關於我們

【今日體片】戴頸鍊踢波遇雷劈變火人 俄羅斯小將奇蹟生還

蘋果日報 2020/07/07 00:00

死神降臨今日體片Ivan ZaborskyFC Znamya Truda

大家踢波嗰陣,當然聽過有人提醒唔好有飾物喺身上,除咗係保護其他人,唔好畀頸鍊戒指撞到之外,原來其實都係保護緊自己。
俄羅斯第三級聯賽球隊FC Znamya Truda,日前喺訓練中途,一位16歲門將Ivan Zaborsky喺禁區頂試吓腳頭起腳射門嗰陣,突然畀雷劈中,CCTV睇到佢爆出一個火球,之後立即倒地昏迷。當下場邊隊友、教練同職員都畀雷聲嚇一嚇,但見到隊友倒地,都唔顧危險衝出去救人。據報道話教練Anton Basov立即幫佢做心肺復甦(CPR)急救。
Ivan Zaborsky之後被送往當地醫院,又轉送莫斯科嘅醫院進行治療。當地媒體引述佢嘅女朋友Yelena同姐姐Karina話,佢情況已經開始穩定,並開始恢復意識,不過因為劇痛,好快又陷入昏迷。加上佢肺部有損傷,需要時間恢復。報道話,佢頸嘅位置嚴重燒傷,相信同佢當時戴住頸鍊踢波有關,以致產生導電狀況,先會搞到傷勢咁嚴重。球隊經理人Igor Mayorov亦都表示,Ivan康復情況唔錯,對外界刺激都有反應,相信好快就可以清醒甚至再落場比賽。
empty