差人強攻中大，令唔少市民同中大校友震怒，不過身兼行政會議成員嘅新民黨主席葉劉淑儀，前晚喺facebook洋洋灑灑寫咗篇「千字文」，批評大學校長冇培養好學生嘅品格，認為佢哋幾百萬年薪太高，係「屍」位素餐。唔好以為八方寫錯字，葉太篇文章的確寫〈大學校長屍位素餐〉，唔通葉太我手寫我心，覺得啲校長只係喪屍，識得郁但冇意識？不過，見佢之後好快就修正返做「尸位素餐」。
點解葉太覺得大學校長「屍位素餐」？佢嘅理據係𠵱家啲大學生好暴力，例如中大生喺二號橋上面掟嘢，又針對內地生同埋教授，所以葉太不禁要問大學校長咁多年嚟喺培養學生品格方面做過啲乜喎。除咗寫文，葉太仲po咗張八大校長薪酬表，試圖證明佢哋幾咁高人工。