當年今日

建造界意見 - 左丁山

蘋果日報 2010/01/05 00:00


建造W係建造業的具領導地位人物,佢與大公司總裁建造H,再加埋建造T一齊在世貿中心會所請食飯,正所謂無事不登三寶殿,為乜呀?建造W話佢哋素來低調,只做不說,況且平時行家各有各忙,互相競爭投標,為搶生意及追工程而忙個不休,邊度會有時間搵左丁山之流坐埋吃飯吖。不過現在係二十一世紀喇噃,好多不同聲音日日在媒體出現,好似代替咗佢哋發言咁,如果佢哋再唔出聲,好容易俾人誤會一啲活躍專業人士嘅聲音就代表咗佢哋,故此都試吓粉墨登場,與媒體朋友會面。
編輯L問佢哋,市場消息話十大基建上馬,建造業會出現嚴重人手不足情況,實情如何?建造H答話,建築工人要登記註冊,名單上有二十九萬人,但實際上開工嘅大約有十一萬人。咦,失業率咪好嚴重?建造H講:「又唔係嘅,其實過往十年,全港公共工程、私人工程嘅合約價值由千零億元跌至五百幾億元一年,好多工人已經流失咗,譬如轉行做的士,老嘅或索性退休,明年開始有大工程展開嘅話,可能有轉行工人回流,故此暫時我哋唔驚有工人短缺。」
建造W補充,建築工人比較年紀大,中位數年齡係四十幾歲,過五十歲者十分普遍,佢擔心呢行後繼無人,建造業訓練局已開班訓練急需工人,譬如炮王訓練班,反應非常好,有幾百人參加,但又係四十歲左右嘅,真正年青人,即八十後,對加入建造業嘅興趣比較低。無他者,呢行係勞動工作,戶外勞動多,唔肯捱之人,好難做落去。我哋問:係唔係人工低,無晉升機會呢?三位仁兄都話一至萬二銀一個月唔難搵啫,炮王起碼有日薪過千,未來幾年應該不愁,但之後十年呢?建造W話:「冇人敢預測嘅啫,我哋已經好過新加坡好多o架嘞,譬如高鐵上馬後又有其他工程接上嘅話,呢行會有五六年好景嘅!」講起高鐵就十分敏感,有人問及公盟方案,建造W與建造H都話佢哋同意工程師學會嘅報告,認為公盟方案低估造價,低估收地之困難,低估環評報告帶來之延長時間與成本,如果再傾兩三年嘅話,成本必定更高,好唔實際。簡單啲講,佢哋建造界一致認為高鐵應該及早興建,不應再拖,佢哋嘅公司未必投到標,但對整個建造業關係重大喎。