中環在線:樂視騎呢記招
汪峰突現身sell耳機 - 李華華

蘋果日報 2016/04/21 00:00


樂視搞發佈會出咗名「時間長,冇料到」,每次記招「最低消費」都要花近3小時,例如之前喺香港公佈英超月費,就講成兩個鐘先開始講價錢,真係少啲耐性都唔掂。噚日樂視就喺北京搞發佈會,同時喺香港、印度同美國三地直播。
香港區直播就揀咗喺銅鑼灣HMV餐廳進行,正當一眾記者坐定定食住嘢、等睇樂視最新電視、電話、VR同埋樂視汽車時,奇怪嘅事情發生了。
好哋哋一間科技公司搞發佈會,中途竟出現統一綠茶!正當大家以為只係植入式廣告,點知樂視創辦人賈躍亭就話要交個台畀統一企業中國總經理侯榮隆,搭單發佈埋統一最新推出嘅綠茶,超級騎呢。嗰頭飲完支綠茶,以為返正題,點知內地歌手、影星章子怡嘅老公汪峰,走出嚟sell耳機,到底華華睇緊乜呀?媽,我好亂呀!