曼城隊長高柏尼，星期一尾二輪英超轟出一腳世界波遠射，幫藍月主場1:0險勝李斯特城，繼續以一分壓住利物浦排榜首，衞冕成功在望。不過入波功臣高柏尼就爆料，話佢起腳前身邊阿古路、史達寧等隊友係咁喝停佢，仲講笑話使乜啲後生仔教阿叔射波！

阿古路史達寧認衰

一啲失分空間都冇嘅曼城，今場只係贏形勢但埋門唔算多，大家越踢越急之際，70分鐘中堅高柏尼推個波去到25碼附近，冇李城球員去逼之下，佢決定推橫半步就狂抽，結果射出個掛網世界波，攻入佢今季聯賽第一球，亦都係加盟曼城11年嚟第20個入波，就咁幫曼城險勝拎到英超13連勝，下星期日煞科作客只要贏到白禮頓，就可以衞冕英超。

高柏尼就話：「我射之前聽到有人大叫『唔好射！唔好射！』，我踢波踢到今日，使乜後生仔教我點樣射波！15年嚟，我一直話畀人知我都可以入世界波！」阿古路同史達寧就認咗，自己當時有份叫隊長快啲交波。高柏尼亦都冇講錯，每逢關鍵比賽佢就特別醒神，上屆英聯盃決賽為曼城攻入第二球，幫球隊贏阿仙奴3:0捧盃，而13/14球季煞科，高柏尼又係頂入「燕梳」球，幫曼城主場贏韋斯咸2:0確定捧盃。而最緊要就係11/12球季尾3輪嘅曼市打吡，高柏尼頂入全場唯一入球，幫曼城主場1:0贏曼聯，就咁過頭升上榜首帶到尾。

贏波功臣未有新約

今場亦都係曼城今季最後一次主場作賽，帶住四個仔女嘅高柏尼直情眼濕濕，原來呢個季後約滿嘅曼城忠臣仲未有新約，佢就話想留喺曼城。呢個近年好多傷患嘅比利時硬漢，就話一定唔會掛靴，而賽後承認高柏尼起腳時唔睇好佢入波嘅領隊哥迪奧拿都話，完季後會再同高柏尼傾吓，希望達成共識。

贏埋今場，哥帥領軍嘅曼城連續2季橫掃英超19隊，喺英國頂級聯賽史上，只有19世紀嘅普雷斯頓試過。不過話時話，今場曼城贏到波，都要多得李斯特城後備前鋒兼曼城舊將伊恩拿祖，喺87分鐘近門錯失咗黃金機會，射到離晒譜咁出界先掂！如果佢入咗，利物浦就一句唔該升上榜首喇！