港台今年特別為區議會選舉搞咗幾個區選論壇，邀請幾個特別選區猛料候選人喺鏡頭前辯論一番，等市民了解候選人多啲啲。八方聽聞，港台喺呢件事上食咗唔少檸檬，因為唔少親中陣營競逐連任嘅候選人都拒絕出席，話費事畀其他新丁叨光，結果港台迫住要揀過第二啲選區嚟做。
喺大埔墟選區參選嘅民建聯立法會議員李國英就直認不諱，親口請港台食咗個大檸檬。佢話與其花時間搞呢啲論壇，不如實實際際做多兩個鐘頭地區活動仲好，佢認為自己做咗兩屆區議員，如果仲要出席呢個論壇sell自己就好唔掂啦。佢嘅對手公民黨曾國豐話，就算李國英做咗兩屆區議員，都唔等於市民知道你嘅理念㗎嘛，對於搞唔成論壇覺得好失望囉。

另一個拒絕出席論壇嘅焦點人物就係自由黨山頂區候選人林文傑，佢早前都好坦白咁講，想多啲做地區活動，所以sayno，好似唔想畀身為大律師嘅對手、公民黨陳淑莊佔便宜咁噃。綜觀兩個搞唔成論壇嘅選區，都有代表公民黨嘅候選人出選，唔通由大狀撐起嘅公民黨黨員公認口才好，所以對手見到佢哋都怕怕？