韓劇《誘惑》男星權相佑早前飛咗去中國拍攝內地電視劇《愛歸來》，不過呢排似乎劇組放假，身為24孝老公嘅權相佑就立即飛返韓國見吓老婆孫泰英同一對囝囡。

孫泰英噚日喺個人Instagram上載咗一張老公嘅相，相中權相佑身穿灰色運動衫、戴住黑超相當型仔，而孫泰英亦留言：「短暫休假返咗嚟屋企，打算喺單槓示範引體上升畀祿熙睇嘅爹哋，係咪好攰呢？休息吓啦。」孫泰英似乎都好緊張老公嘅身體，叫佢趁機休息吓。

而權相佑日前亦公開咗自己嘅多張自拍照，應該係拍攝空檔時影嘅，相中權相佑望住鏡頭笑得好開心，佢仲話其實自己私下唔擅長自拍，但為咗同親朋好友多多互動溝通，所以就多咗自拍，又讚自己自拍技術越嚟越叻，真搞鬼！