劉愷威同佢嘅國產老婆楊冪，近年不時傳出婚姻亮起紅燈，就算今年6月，二人喺香港合體，為囡囡小糯米搞3歲生日會，但當時亦有指兩公婆貎合神離零交流。（新聞連結： http://bit.ly/2srSn8g )

今日係楊冪31歲生日，做老公嘅劉愷威，今朝一早貼咗張由囡囡小糯米親自畫嘅生日畫俾媽咪，劉愷威仲留言話：「每年慶生的祝福裡，多了一位多才多藝的小美女~畫技絕佳。」再tag埋小糯米媽咪楊冪個微博。事隔1分鐘，楊冪就即刻喺自己微博轉貼老公呢條生日留言，仲加咗3個心心，兩公婆緊密互動，似乎想話俾人知，佢哋感情冇乜大問題喎。

其實劉愷威嘅工作室早喺噚晚深夜就事先張揚，貼文指愷威嘅微博原來冇綁到手機用戶，搞到唔可以向楊冪發生日祝賀，即係話，其實劉愷威噚晚已經準備好向老婆講生日快樂，可惜微博出咗問題，搞到今朝先留到言。

據知，壽星女楊冪，目前正身處大陸趕拍電視劇《扶搖》，加上囡囡小糯米要返學，睇嚟一家三口要遲啲先補祝到生日。