【新增：頭籌善信借得1.8億】
一年一度的「觀音開庫」今晚在多個觀音廟舉行，紅磡觀音廟每年也有大批善信入廟借庫，晚上7時已有200多名善信排隊等候晚上11時入廟借庫，紅磡觀音廟今年借庫銀碼由3,000萬至10億。有善信批評財政預算案一年不如一年，小市民難以受惠，直言希望向觀音借庫「借夠移民」。拿得頭籌的蘇先生今日凌晨已排隊輪候派籌，等了一個晚上獲得1號籌，他指已向觀音借庫3年，去年同樣輪得頭籌，「好靈啊！我第一年向觀音求子，結果實現咗」。他指今年主要求健康，抽到多少銀碼則隨緣，最終借得1.8億，蘇先生表示「好滿足，年年都係咁㗎啦。」

在下午約4時開始已經於佛光街遊樂場外的輪候區排隊的毛先生今年第5年向觀音借庫，他坦言：「最好今年可以借夠移民，同埋想借到年薪高過特首啦，不過抽到幾多就幾多啦，都係攞個意頭，十億就開心啲」。談到財政預算案，毛先生直言「無眼睇」：「97之後嘅財政預算案一年比一年唔掂，話有幾千億儲備，但我哋去到急症室又無位睇醫生，醫院、護士、醫生都唔夠，唔夠樓住，呢個唔係進步成熟嘅社會囉，最基本嘅衣食住行、醫療都搞唔掂，唔該換咗個政府班子佢啦。」

季小姐同樣約下午4時已到場排隊等候，她表示已向觀音借庫30多年，過往借庫金額由數萬至數億不等，對於今年借庫的理想金額，季小姐認為隨緣便可，「最緊要身體健康，出入平安，同埋世界和平」。提到今年的財政預算案，季小姐直言不理想，「縮咗水，亂晒籠，個財爺都無鬼用」，認為應增撥資源照顧長者及基層市民。

越接近開庫人流逐漸增多，晚上7時到場排隊的陳先生今年第4年向觀音借庫：「借到幾多都無咩所謂，其實最緊要係健康同埋順境」，過去跟朋友一起借庫，今年獨自前來，「因為順境就繼續借，當一個傳統習俗咁做」。對於今年的財政預算案，他評價為「一般」，「幫唔到中產，又幫唔到有需要嘅人，唔好喺間房諗嘢，真係落區睇吓人嘅需要」。

雖然人流不絕，但紅磡觀音廟外售賣祭品的店舖直言生意難做，沛記負責人指近兩年的生意較差，「啲人可能去咗其他觀音廟借庫，人流都少咗」，而今年祭品的成本價增加近兩成，她預計明日假期的生意會較好。

3月7日《動腦Q馬拉松》
一日玩11場 全日派22萬
12:30pm-10:30pm
Let's QQQQQQQQQQQ the money！
http://bit.ly/2ICO2Mb