全國政協委員李大壯做得港台商貿合作委員會主席，當然了解台灣人做生意嘅習性，佢話，喺台灣做生意就好似嫁女，要有嫁妝，好似已有幾多間屋喺手，仲要明確咁講到，未來五至八年嘅情況係點喎。唔知肥佬黎認唔認同呢？
係人都知，中國人做生意講關係，台灣人一樣講人情交情。李大壯以中台洽商訂立海峽兩岸經濟合作架構協議（ECFA）為例，原來開始傾嘅時候，雙方互信不足，「連用繁體字，定係簡體字都爭論一番。」
佢又分析，2009年中策（235）投資南山人壽遭遇滑鐵盧，就係唔了解台灣人。佢指，同台灣人傾生意，未建立好私人關係就開始傾生意，只會停留喺雙方律師同律師傾嘅層面。照咁睇，中策主席柯清輝下次再有意投資台灣生意，要搵李大壯傾傾先。