經典日劇《阿信的故事》女主角田中裕子與著名演員市村正親，今日現身尖沙嘴文化中心為香港公演嘅舞台劇《蜷川馬克白》接受傳媒訪問。

《蜷川馬克白》改編自莎士比亞四大悲劇《馬克白》，係日本已故戲劇導演蜷川幸雄作品，於其逝世一周年紀念再度公演，並衝出日本於香港等地演出，市村正親與田中裕子分別飾演野心勃勃嘅馬克白及馬克白夫人。

市村正親係女星篠原涼子丈夫，有豐富舞台演出經驗，《蜷川馬克白》已經係佢第4度與蜷川導演合作，被問到今次作為悼念蜷川幸雄嘅公演，有冇壓力？佢話：「沒有壓力，反而有點肅然，因為當舞台燈射到觀眾席時，會覺得導演就坐在觀眾席，怕導演會隨時鬧人。」

提到與導演最難忘回憶，市村謂：「兩年前導演為我於劇本簽名，寫着：『你好努力。』當時導演已身體唔好，有點手震，導演還為簽得不好道歉，真的很難忘。」

故事由莎士比亞名作改編，但市村正親指只覺得自己演緊日本舞台劇，佢話：「因為莎士比亞作品好多對白，導演已刪走了很多對白，現時這個故事只是講述一對夫妻在聽從三個巫婆預言後，如何墜落，人生一直解體。」佢仲話會將亦故事聯繫到自己人生，覺得男主角盲目相信巫婆嘅說話，好蠢。