黃心穎同葛民輝(阿葛)為一個春茗擔任司儀，去到澳門威尼斯人酒店開工，黃心穎以低胸連身裙性感示人，阿葛就着上由大會度身訂造嘅套裝現身，同場仲有Supergirls同鄭秀文擔任表演嘉賓。

黃心穎表示佢係第一次嚟澳門做呢類型嘅job，大家都知佢有做司儀，所以呢排新年佢都好多呢啲job。被問到澳門show嘅酬勞係咪好啲呢？佢話呢個應該係個好價錢嚟，不過都要問返經理人先知，今日個活動都幾大型。佢仲話﹕「第一次同阿葛做拍檔好驚呀，因為佢係前輩，口才又好好，驚自己接唔到，希望佢會手下留情。」咁你本身轉數快唔快先？佢話﹕「本身都ok嘅，但係上到台就會慢啲，因為驚講錯嘢，個腦要過濾下啲說話先得，不過做呢類型工作可以見唔同嘅拍檔都幾開心。」

咁出席呢類型活動會唔會順手識下男仔先？佢表示﹕「應該冇咁嘅機會喇，因為一直都喺台上面好少接觸。」但係唔係呢到有好多老闆喎，佢話﹕「哎呀，我忙住睇稿唔會得閒囉。」其實你係咪好拒抗呀？佢就話﹕「唔係呀，不過要專業啲，要專心工作。」被問到佢會唔會留低賭下錢玩兩手，佢話應該冇機會喇，因為要開早，同埋自己個膽比較細唔敢。

阿葛套衫係由大會幫佢度身訂造，佢話個師傅留意之前草蜢同較硬個演唱會，入面有一part紅歌嘅軍服個膊頭好有台型，所以有呢個設計。

記者問佢呢個job係咪收好多錢？佢就笑住話﹕「緊係啦，我好貴架，我有幾何做呢啲show吖，佢哋重金禮聘我過嚟o架，仲要坐直升機。」佢話套衫係tailormade好認真，不過呢啲都唔使我成本，係大會嘅，佢仲話差啲仲要佢做埋facial添。

被問到佢會唔會同新人合作(例如黃心穎)，阿葛搞笑話﹕「佢直程係我前輩啦，教我好多嘢！」

你就笑得出啫，但係黃心穎好驚喎，佢驚你轉數太快會玩佢喎，你又點睇先？阿葛話今日會盡量慢啲﹕「我呢啲只係負責現場人嘅情緒，至於要用國語叫嘉賓上台祝酒就唔會係我啦，因為我唔係正經嗰隻嘛，所以要兵分兩路。」

被問到呢場show收幾多錢酬勞，佢就搞笑話﹕「冇幾個億點請我呀！」咁會唔會好似林海峰一場show嘅收入咁呀？佢話咁又唔知喎，因為講演唱會嘅話就要睇下係邊個老闆。講講下佢突然改口話﹕「其實我收得好平o架咋，諗諗下廢事講太貴，驚稅務局會捉我。」阿葛果然轉數又夠搞笑，唔怪得黃心穎會咁驚啦。