昨天內地公佈CPI為4.4%，比預期高，其實預期的4%在過去一周已被調高，但結果比預期更高。更令人意外的是A股無視加息機會提高，照樣上升，港股亦反常上升，似乎大市趕住升，調整太浪費時間，速調速決，散戶多愛估短線，但其實賺大錢最重要是大方向正確。
要知現在大方向，先要知道這個世界在做甚麼，以下想法純從陰謀論出發，與士佳無關：其實這次金融海嘯源自美國，本來次按問題挨十年八年便無事，美國也想過不干預，但被雷曼一役嚇怕了，奧巴馬上台又不容有失，為爭取連任就想出一條QE計。其他國家估唔到自己會受幾大影響，驚真的出現大蕭條，便跟着去QE，點知發覺係大家攞錢出來玩ShowHand，全世界都用真金白銀玩，但老美卻攞大富翁入面的公仔紙來玩，輸晒又可以攞另一盒出來玩過，點敢同佢癲。

逢跌買貨享受泡沫

人家自己出事，結果輸出通脹，水浸全球，祖國見你洪水湧至，就用海綿去吸，開始行緊縮政策收緊銀根，發股票上市吸水，但大家幾時見過海嘯殺到可以用海綿對付呢？當中最慘的是國際交鋒，戰場在香港，因為香港是一個冇閘的水壩，資金自由進出，港元又與美元掛鈎，冇外滙風險，資金湧入炒高晒資產，本地人唔跟買唔得。大家見股神大鱷紛紛湧至，便知周邊發生何事，要幾個特區官員去應付國際洪流，開玩笑吧!
要知道現在是非常時期，要用非常想法，如果用正常想法，肯定覺得現在超買（先前筆者也曾中招），但若知道大戶在想甚麼，便知道即使短期可能尚有調整，仍是要逢跌買貨。無限風光在險峯，救不了香港，最低限度可以救番幾個香港市民──你及你的家人朋友。唔好被人愚弄，未來一年是享受泡沫之時，積穀防饑此其時，如何自救，容後再談。

張士佳
寶來證券（香港）董事　投資服務部
mailto:[email protected]