29年嚟Gundam家用、街機遊戲出過無數，唯獨《戰絆》可以話100%仿真，佢竟然用到1:1模擬球形駕駛艙，絕對係現時最巔峯之作！
未入機艙，睇見7呎高鵝蛋外形，感覺就好似睇緊《2001太空漫遊》；進入窄窄艙門！270°半球形屏幕，細心睇會發現是由頭頂一部投影機所投放影像，須知以機艙約4呎的深度，以短投技術做出近50"的半球形立體影像，難度同香港太空館全天域電影有得揮！實試感覺，可能半圓投影做出咗深度同空間感覺，開Game嗰嘢喺木馬同野牛號彈射一刻，真係有種暈眩嘅真實速度感覺，對Gundam迷如筆者，真係有種非筆墨形容嘅感動。

今次到港《戰絆》採用8機一組連線，基本是以4對4、聯邦VS自護（唔齊腳就以NPC出戰）；遊戲每局$35，可打足15分鐘內2場戰役，相對日本收費500日圓/1局（約$38.5），香港玩仲要平幾蚊㖭！
遊戲誘人處係有軍階升級制，初玩時只有吉姆及渣古使用，但隨經驗分數累積，FA高達、老虎、雷射坦克等經典機體都可以用經驗分購買，據現場觀察，這台《戰絆》是最新4月Update的VER1.12版本，兩方戰力可選機體達42部之多！

遊戲操控方面，可以話RX-78嘅完全翻版！二支操控桿肩負了有如坦克車的轉向功能，有打過《VirtualOn》老機迷應該難佢唔到；兩支桿上各有兩顆按鍵，左手為劍、右手激光槍，分別掌控LockOn及攻擊指令；不過最精髓係底下兩個腳掣，分別有左跳躍、右Boost功能，完全跟足原著設定，你話有乜辦法唔打到阿寶上身！
就試玩心得，機體行動能力緩慢，Boost及跳躍能力未及4個身位及2層樓，不過隨着升級得到新機體，應該會有所改善；另外自己戰區的戰艇是有維修能力的，俾人打到重傷時記得維修！

WonderParkPlus（25766659）
地址：銅鑼灣告士打道280號世貿中心6樓