當年今日

印度乒乓 - 左丁山

蘋果日報 2002/01/05 00:00


體育界活躍分子老L在新年前請左丁山到沙田馬會會所二樓「銀袋」飲下午茶,傾吓閒偈。喺「銀袋」飲茶啲人,十分悠閒,坐響度夠晒輕鬆。左丁山去洗手,經過一位男士背後,呢位仁兄豎起用木夾夾住嘅嗰張報紙,全神睇緊。成張報紙打直遮住佢塊面,佢位女伴坐響對面,唔知佢睇緊乜,左丁山後面行過。當然睇到佢係睇緊《蘋果日報》G版圖文並茂介紹澳門打雙飛,啲肉感女人照片放到咁大,近視眼都睇到啦。
老實講,G版唔係唔睇得,不過冇理由喺馬會咖啡室當住女伴面前公然登起嚟睇啩,唔淨止對女伴冇禮貌,其他女會員亦覺得肉酸啫,呢啲男人實在要再教育。
好多年前,馬會只供應《華僑》、《星島》,後來大概因應會員要求,餐廳供應多幾張報紙畀會員閱讀,但就冇抽走啲兒童不宜嘅「成年人專版」,於是間中會出現一啲令女會員面紅嘅情況。
同老L講體育,經常可以吸收新知。佢話亞洲體壇之中,以前被慣常認為窮國嘅印度,異軍突起,啲年輕印度乒乓選手,非常有水平,而且啲印度小子體能特佳,捱得起緊湊緊密嘅賽事,未來幾年可以威脅中、日、韓;而且印度𠵱家富起來,與伊朗等國家聯手,爭辦賽事,而經常與中國聯手嘅日本、南韓,就五行缺水,唔敢拍心口,搞到中國在亞洲乒乓球壇,冇以前咁話得事㖭。印度啲資訊科技業發展迅速,已非吳下阿蒙矣。