馮仁昭四圍超:
劉婉君攜新歡夜麻麻打保齡

蘋果日報 2002/04/09 00:00


黃子華舊愛劉婉君,噚日凌晨同一女四男友人去咗九龍城啟德保齡球場消遣,劉婉君離開嘅時候,重得到其中一位男士為佢開車門,可謂照顧周到。
據知,劉婉君同友人喺保齡球場玩咗大約一粒鐘,佢哋一行六人盡興後便離開。當時有一名穿白恤衫嘅男性友人重發揮紳士風度,佢除咗幫劉婉君開車門外,重同佢一齊坐後座離去。

森美自認球技渣
劉婉君見到記者上前影相,佢一臉不悅,問劉婉君係咪同男友一齊嚟,佢話:「唔係,我間唔中嚟打波,但𠵱家俾你哋影到相,我唔嚟嘞。」
此外,商台DJ森美噚日凌晨亦同友人喺啟德保齡球場嗰度打保齡,佢話:「我啲球技好渣,唔好講幾多分,我早幾日都同小儀嚟打過,佢今日有嘢做所以冇嚟啫。」

許志安嚴禁歌迷吹哨子
許志安(安仔)噚日出席商台舉行嘅《拉闊音樂會》記者會時,佢話喺呢個月三十號舉行嘅《拉闊音樂會》,唔會畀觀眾帶哨子同螢光棒入場,做法同葉德嫻一模一樣。問安仔有消息話梁詠琪嫌棄安仔,搞到佢哋原本合作嘅電影,要改由宋慧喬頂上,但安仔就話完全唔知呢件事,佢重話唔理邊個演出,都會全力做到最好。
梁詠琪屋企貓狗做臨記
梁詠琪(GiGi)噚日接受港台節目《娛樂滿天星》嘅訪問,GiGi話佢就快會推出新碟,而佢喺大碟嘅設計上就畀咗好多意見,佢話:「因為上次要配合演唱會,所以感覺會好華麗,但係今次張碟就會生活化同人性化啲,我重借埋屋企隻貓同五隻狗做臨記㖭!」

蕭芳芳怒斥假「護苗」狂徒
蕭芳芳一直以嚟都致力發展「護苗基金」,但係近排就有不法之徒假扮「護苗基金」職員,用電話性騷擾小朋友,令到芳芳姐非常憤怒。而作為「護苗基金」主席嘅芳芳姐就澄清佢哋從來都唔會打畀市民做電話調查,就算有都會做足宣傳話畀市民知道。

霆鋒分手表現扣晒分
謝霆鋒同王菲分手,跟住霆鋒嘅一連串表現,真係失咗唔少分。
好似霆鋒嗰日喺台灣返港,喺機場公開話同王菲分手,但係跟住就即刻維護柏芝嘅父母。
嘩!唔使咁快轉軚啫!霆鋒咁做,柏芝可能會好冧,不過阿菲就心傷咯,外間對霆鋒嘅印象亦會打晒折扣。

英皇電影陣前易帥
英皇電影老闆楊受成見公司開拍嘅戲票房冇乜大起色,專登搵咗張承勷入佢公司做話事人,陳嘉上以後主力做製作。聽聞咁嘅安排令陳嘉上有些少唔舒服,因為佢傾緊嘅開戲計劃,𠵱家都停晒。其實電影市道唔好,又點只英皇一間公司開戲要好慎重考慮吖?