周渝民（仔仔）、許瑋倫同徐熙媛（大Ｓ）嘅三角戀問題鬧到滿城風雨，最近又有雜誌話「連生」朴恩惠先至係關鍵人物。之後仔仔就俾人話佢有憂鬱症同精神有問題，其實之前都有報道話佢去睇心理醫生，最新一期嘅台灣《壹週刊》重話佢曾經用利刀割傷手腕。仔仔日前去製作公司試新戲造型嗰陣，佢手臂真係有一條條好細嘅疤痕。

傳連生係第三者

雙子座嘅仔仔形象陽光、可愛，有時會搞吓笑，但原來佢私底下好沉默。身邊朋友都知佢手腕同手臂上有十幾道刀痕，又話佢平時鍾意匿喺屋企打機，或者揸快車嚟減壓。
台灣《壹週刊》話可能仔仔喺單親家庭長大，對愛情冇安全感，佢同許瑋倫拍拖時，會經常發出奪命追魂call，鬧交時又會喺女友面前自殘相迫，咁樣真係嚇走許瑋倫，不過佢哋真正分手原因其實係有第三者介入。
仔仔經理人姚宜君話冇聽過仔仔睇醫生，冇見過佢情緒不穩，亦冇仔細睇過佢隻手，所以唔知佢有冇自殘。至於三角戀，聽聞許瑋倫為此日日喊，但佢老友黃子佼就話好肯定大Ｓ同仔仔冇可能拍拖。而同仔仔拍劇嘅連生據聞佢去台灣時，日日同仔仔一齊，唔知連生係咪第三者喎。