港視發牌失利一事,為麥子樂同一眾港視藝人帶來沉痛一擊,而且,死因不明。今日麥子樂亦有到灣仔實體票站投票,但佢話同港視一役無關:「我會多留意香港嘅政治,因為我覺得應該要關心呢樣嘢,我覺得香港人太幸福了,乜都唔使理,人哋搞晒俾你,所有嘢……唔可以咁樣,衣食住行所有嘢都係關於政治,你唔可以唔理。」
麥子樂表示早於20號當日已經透過apps投票,但係個網絡唔係好得,所以今日再嚟投票,想doublecheck之前投唔投到,但原來票站話唔可以咁check,只可以overwrite。麥媽媽亦有投票。至於之後會有乜嘢行動,麥子樂自言未知。
談到不少藝人或擔心被影響飯碗,故未有表態,麥子樂話:「可能佢哋冇公開,暗中有投票。唔可以話佢哋做得啱或者唔啱,只不過好似普選一樣,每人有自己嘅權利去選擇。作為香港人,你係要關心呢個社會,你見到好多身邊嘅人,由唔理到去理呢件事……以前可能只係睇下娛樂新聞,上下fb,但呢幾日見到啲打壓成份嘅嘢,我諗佢哋都會醒覺,香港人係會醒覺。」