【批中黃翠如已婚】曾撞見阿嬌兩公婆 麥玲玲:海外造人機會大啲
麥玲玲黃翠如結婚
堪輿學家麥玲玲今日喺彩虹拍廣告,佢之前批中蕭正楠同翠如會結婚,佢話:「其實我睇佢哋嘅盤時已經知道佢哋結咗婚,我梗係唔講啦,所以我就講笑咁話佢哋偷偷哋註咗冊,噚日我恭喜咗翠如,佢喺度大笑,仲話我好勁,我同佢講話希望第二樣都準,就係出年有喜事,明年添丁,佢好開心話『承你貴言』。」
問到今日註冊鍾欣潼(阿嬌)會否好快生B?玲玲姐就話:「記憶中佢哋啱啱拍拖時喺飛機撞過,知道佢哋係結婚年、今年有喜事,有喜嘅話就要努力啲,要配合,配合時間同出多啲trip,OK嘅,海外造人機會大啲。」
玲玲姐仲爆最近喜事連連,C君都好事近,佢話:「我已經幫佢擇咗日,仲揀咗地方,我話贊助佢酒席,點知佢揀四季,睇佢擺幾多圍先,開心嘅。」
另外,今日拍攝附近係學校區,玲玲姐吸引一班學生邀請合照,而講到注重健康,玲玲姐話:「平時我早睡早起,11點左右就瞓,朝早6點9起身,做運動,食水果餐,冇不良嗜好,做呢行成日搭飛機,新陳代謝會慢,人好易攰,所以要勤力運動。」
精選娛聞,喺晒《娛果》
http://fb.com/appledailyent