【露面谷新劇】南果步開腔談老公渡邊謙偷食:喺呢個身心疲累時期...
偷食渡邊謙南果步
渡邊謙與南果步曾屬圈中模範夫婦,可惜男方卻被爆偷食。
南果步自老公偷食後首度露面,佢似乎已心情平復仲展現笑容。
日本男星渡邊謙月前被爆背第二任太太南果步,與只得36歲嘅圈外小三發展婚外情,令其好男人形象盡毁,事後渡邊謙再被爆對小三感情認真,令患乳癌嘅南果步大受打擊,夫婦關係難以修補,佢現已搬離兩人豪宅。
今日,南果步現身新劇《定年女子》於東京嘅記者會,係佢自老公爆偷食醜聞後首度公開露面,《定年女子》講述一班中年女性展開自己第二個人生,南果步角色諷刺地係講佢因丈夫偷食離婚後,要獨力照顧女兒。
記招上南果步有展現笑容,似乎已平復心情,佢大讚劇本有趣,發言時亦語帶雙關流露對丈夫偷食嘅心情:「於這個身心疲累的時期,接到這個劇本,像得到神的指引一樣。」南果步又指年輕時候情緒低落時,需要好多時間撫平傷口,但人到50幾歲就會變得堅強,低潮亦只視為自己人生嘅其中一頁,佢話呢部劇好似係叫嘅大家積極向嘅打氣歌。