剛完成三個月警察機動部隊嚴格訓練嘅大隊長方安妮警司，最近操到好fit，出camp後即刻被派到西九擔任機動部隊「B」連指揮官，八方聽聞佢原來係警隊歷來第七位女性大隊長，同時亦係首位女性出任西九龍總警區嘅機動部隊指揮官。
八方又打聽到，身為著名烹飪專家方太嘅千金方安妮，最近被一本雜誌話佢唔識煮餸。不過，經八方追查下，證實消息係唔正確嘅，原來方安妮唔單止鍾意煮，仲好鍾意食嘢㖭。識佢嘅朋友話，佢同喺上月退休嘅老公助理警務處處長黃敦義一樣，放假都鍾意捐窿捐罅搵嘢食，有時仲喺屋企煮「九大簋」招呼親朋，當眾表演廚技。唔講唔知，方安妮嘅撚手菜係法式洋葱湯同芝士蛋糕，而佢老公黃敦義煮牛扒同中菜仲有一手㖭。